REFERENCIA DO CONSELLO DA XUNTA DE GALICIA
QUE TIVO LUGAR EN SAN CAETANO,
O 4 DE ABRIL DE 2012,
BAIXO A PRESIDENCIA DO
SR. D. ALBERTO NÚÑEZ FEIJÓO
DECRETOS
- Decreto polo que se dispón que cese Manuel Borobio Sanchiz como director xeral de Sostibilidade e Paisaxe.
- Decreto polo que se nomea director do organismo autónomo Instituto de Estudos do Territorio a Manuel Borobio Sanchiz.
__________________________________________________
O CONSELLO DA XUNTA NOMEA A MANUEL BOROBIO COMO DIRECTOR XERAL DO INSTITUTO DE ESTUDOS DO TERRITORIO
- Desde maio de 2009 ocupouse de xestionar a Dirección Xeral de Sostibildiade e Paisaxe, case tres anos nos cal acadou a aprobación do Plan de Ordenación do Litoral e as Directrices de ordenación do territorio
- A partir do 7 abril o Instituto de Estudos do Territorio funcionará con total operatividade para reforzar o labor de asesoramento con concellos así como dar unha resposta áxil e eficaz ás necesidades dos cidadáns e dos equipos técnicos en relación ao territorio e á paisaxe
O Consello da Xunta autorizou hoxe o proxecto de decreto polo que se nomea director do Instituto de Estudos do Territorio a Manuel Borobio Sanchiz, ata o momento director xeral de Sostibilidade e Paisaxe da Consellería de Medio Ambiente, Territorio e Infraestruturas. Nesta mesma reunión tamén procedeu ao cesamento como director xeral, cargo que ocupou desde maio de 2009.
Manuel Borobio é arquitecto urbanista pola Universidade de Navarra, especialista en asentamentos humanos pola Escola Técnica Superior de Arquitectura de Madrid (ETSAM), e técnico urbanista polo Instituto Nacional da Administración Pública. Tamén é profesor asociado de Urbanismo da Universidade da Coruña. Nos últimos sete anos traballou no campo da xestión da información, na súa análise como punto de partida para o deseño e a planificación de calquera actuación sobre o territorio e a paisaxe.
De feito, como responsable da Dirección Xeral de Sostibilidade e Paisaxe Galicia acadou dous dos grandes fitos en relación co territorio na Comunidade galega, como foi a redacción e aprobación do Plan de Ordenación do Litoral e das Directrices de ordenación do territorio.
A Xunta tomou a decisión de crear o Instituto de Estudos do Territorio para reforzar o labor de asesoramento con concellos, así como dar unha resposta áxil e eficaz ás necesidades dos cidadáns, e dos equipos técnicos en relación ao territorio e á paisaxe a través da utilización eficiente dos recursos públicos.
Coa constitución deste ente non se incrementará o gasto de persoal e mellorarase a eficiencia e a organización administrativa, evitando duplicidades innecesarias.
Cómpre recordar que o Instituto integrará:
- A recente extinguida Dirección Xeral de Sostibilidade e Paisaxe
- A Subdirección de Sistemas de Información Territorial de Galicia (é dicir, o SITGA, ata o de agora incluído na Sociedade de Desenvolvemento Comarcal)
- A Comisión de Coordinación de Sistemas de Información Xeográfica e Cartográfica.
Así mesmo, no seo do Instituto crearase o Observatorio Galego da Paisaxe.
Con estas medias, a Xunta segue a dar exemplo de austeridade, mellora e optimización da capacidade de xestión da administración, aforro na obtención de información territorial; ao mesmo tempo que transparencia na posta á disposición da cidadanía información territorial.
No hay comentarios:
Publicar un comentario